Kai. Narayanrao Raote Shikshan Prasarak Mandal, Hingoli
हिंगोली - : शिक्षण क्षेत्रातील उल्लेखनीय कार्याबद्दल कै. नारायणराव रावते शिक्षण प्रसारक मंडळ द्वारा संचलित ए बी एम इंग्लिश हायस्कूल येथील कार्यरत मुख्याध्यापक जोसेफ के.जे . यांना प्रतिष्ठेचा ‘भारत भूषण’ पुरस्कार प्रदान करून सन्मानित करण्यात आले. हा पुरस्कार मिनिस्ट्री ऑफ कॉर्पोरेट अफेयर्स आणि नीती आयोग यांच्या संयुक्त विद्यमानाने अहिल्यानगर येथे देण्यात आला. याचे औचित्य साधून शाळेमध्ये संस्थेचे अध्यक्ष माननीय श्री दिलीपजी बांगर उपमुख्याध्यापक आदेश बोराळकर तसेच सर्व शिक्षक व शिक्षकेतर कर्मचारी, विद्यार्थी यांच्या उपस्थितीत त्यांना पुनश्च एकदा सन्मानित करण्यात आले. त्यांच्या शैक्षणिक नेतृत्वामुळे, नाविन्यपूर्ण उपक्रमांमुळे आणि विद्यार्थीकेंद्रित धोरणांमुळे हा सन्मान मिळाल्याने संपूर्ण शैक्षणिक क्षेत्रात आनंदाचे वातावरण निर्माण झाले आहे. जोसेफ के. जे. यांनी मुख्याध्यापक पदाची जबाबदारी स्वीकारल्यानंतर शाळेत शैक्षणिक गुणवत्ता वाढविण्यासाठी अनेक प्रभावी उपक्रम राबविले. विद्यार्थ्यांमध्ये चिकित्सक विचारसरणी विकसित व्हावी यासाठी प्रकल्पाधारित शिक्षण, डिजिटल अध्यापन पद्धती, नियमित शैक्षणिक मूल्यमापन तसेच स्पर्धा परीक्षांसाठी विशेष मार्गदर्शन वर्ग सुरू करण्यात आले. त्यांच्या नेतृत्वाखाली शाळेचा दहावीचा निकाल सातत्याने उंचावत असून अनेक विद्यार्थी गुणवत्ता यादीत स्थान पटकावत आहेत. तसेच सामाजिक बांधिलकी जपत पर्यावरण जनजागृती, स्वच्छता अभियान, वृक्षारोपण, आरोग्य शिबिरे आणि पालक-शिक्षक सहभाग कार्यक्रम यांसारखे उपक्रमही त्यांनी यशस्वीपणे राबविले. विद्यार्थ्यांच्या सर्वांगीण विकासासाठी क्रीडा, सांस्कृतिक स्पर्धा आणि विज्ञान प्रदर्शन यांना विशेष प्रोत्साहन दिले जाते. ‘भारत भूषण’ पुरस्कार वितरण सोहळ्यात विविध मान्यवरांच्या उपस्थितीत जोसेफ के.जी. यांचा गौरवचिन्ह, सन्मानपत्र व शाल देऊन सत्कार करण्यात आला. या प्रसंगी मान्यवरांनी त्यांच्या कार्याची प्रशंसा करत शिक्षण क्षेत्रातील योगदानाचे कौतुक केले. या यशाबद्दल शाळेच्या शिक्षकवृंद, पालकवर्ग आणि विद्यार्थ्यांनी त्यांचे अभिनंदन केले असून हा सन्मान संपूर्ण शाळेसाठी अभिमानाची बाब असल्याची भावना व्यक्त केली. जोसेफ के.जी. यांनी हा पुरस्कार शाळेतील सर्व शिक्षक, कर्मचारी व विद्यार्थ्यांना समर्पित करत पुढील काळातही गुणवत्तापूर्ण शिक्षण देण्यासाठी कटिबद्ध असल्याचे सांगितले. या सन्मानामुळे ए बी एम इंग्लिश हायस्कूल ची शैक्षणिक परंपरा अधिक बळकट झाली असून परिसरात शाळेचा नावलौकिक आणखी वृद्धिंगत झाला आहे.
